Палескiя рабiнзоны

Новае выданне аднаго з самых вядомых і любімых твораў беларускай дзіцячай літаратуры. У кнігу ўвашло больш за 90 ілюстрацый вядомай мастачкі Лізаветы Лянкевіч. «Палескія рабінзоны» — аповесць пра прыгоды і ўменне не здавацца нават у безнадзейных сітуацыях. Двое сяброў-падлеткаў цярпяць «караблекрушэнне» падчас разводдзя Прыпяці і больш за месяц шукаюць спосабы выжыць на востраве і вярнуцца дадому, а заадно знаёмяцца з прыродай Палесся і вымушаны ўступіць у барацьбу з кантрабандыстамі. Кніга будзе цікавай дзецям ад 8–10 гадоў і, безумоўна, дарослым (тым, якія ў дзяцінстве вельмі любілі гэтую кнігу, а таксама тым, якія пакуль яе не чыталі). Пра аўтара Янка Маўр (1883–1971) — славуты беларускі дзіцячы пісьменнік, пачынальнік прыгодніцкага жанру ў беларускай літаратуры. У сваіх творах ён вельмі дакладна і маляўніча апісваў далёкія экзатычныя краіны, але ніколі там не быў. Пісьменнік чэрпаў веды са шматлікіх энцыклапедый і навуковых часопісаў, якія збіраў у сваёй на дзіва багатай бібліятэцы. Пра ілюстратара Лізавета Лянкевіч — беларуская мастачка, графік. За ілюстрацыі і афармленне кнігі Рыгора Барадуліна «Азбука» ў 2018 годзе атрымала прэмію Цёткі. «У дзяцінстве мы ўсёй сям’ёй хадзілі ў паходы і падоўгу жылі на прыродзе, таму праца над Палескімі рабінзонамі вярнула мяне ў тыя часы. Гэтыя цёплыя ўспаміны дазволілі мне лепш прасякнуцца духам прыгодаў і стварыць ілюстрацыі, якія дапамогуць вам разам з героямі павандраваць па таемных кутках Палесся».